A II Xornada “Universidade e empresa ante os retos preventivos” consolídase como un espazo de encontro, reflexión e intercambio de coñecemento entre as universidades galegas, as administracións públicas e o tecido empresarial, co propósito de avanzar cara a contornas de traballo máis seguras, saudables e sostibles.
Tras a celebración da primeira edición, esta segunda convocatoria afonda nos desafíos emerxentes da prevención de riscos laborais, incorporando unha visión integral que abrangue non só a seguridade e a saúde no traballo, senón tamén o benestar emocional das persoas traballadoras, a xestión dos conflitos, a preparación ante situacións de emerxencia, a mobilidade sostible e a adaptación aos cambios normativos que marcarán o futuro da prevención.
A xornada pretende servir de foro para compartir experiencias, boas prácticas e iniciativas innovadoras, favorecendo o diálogo entre profesionais da prevención, responsables institucionais, representantes empresariais, persoal técnico, alumnado en prácticas e comunidade universitaria. Deste xeito, búscase fortalecer a cultura preventiva e promover unha maior integración da prevención nas organizacións desde unha perspectiva centrada nas persoas.
Esta segunda edición reafirma a vocación de continuidade da iniciativa, coa intención de consolidarse como unha cita anual de referencia en Galicia no ámbito da prevención de riscos laborais, contribuíndo á creación dun espazo estable de colaboración entre universidade e empresa para afrontar conxuntamente os retos presentes e futuros da saúde laboral.
Inauguración
Mesa I: Cultura preventiva. Das aulas ao mercado laboral
Mesa II: Entornos de traballo seguros, saudables e respectuosos
Mesa III: Emerxencias, autoprotección e cambio climático
Mesa IV: Diversidade, inclusión e envellecemento laboral
Mesa V: Intelixencia artificial, dixitalización e novos riscos laborais
Clausura
