Estímase que tanto na nosa Comunidade, como no resto do Estado, dúas de cada tres persoas traballadoras en activo carecen dunha acreditación oficial da súa competencia profesional, en consecuencia, a administración laboral creou os certificados de profesionalidade co fin de paliar un dos problemas que teñen un grande número de traballadores/as, como é o feito de que a pesar de ser grandes profesionais non se lles ve recoñecido o seu “saber facer” profesional, o que en moitos casos lles impide avanzar e progresar na súa carreira profesional.

O Certificado de Profesionalidade é o instrumento de acreditación oficial das cualificacións profesionais do Catálogo Nacional de Cualificacións Profesionais -CNCP- no ámbito da administración laboral, con significación para o emprego e asegura a formación necesaria para a súa adquisición, do mesmo xeito que os Títulos de Formación Profesional o fan no ámbito educativo.

Desde esta sección pretendemos dar a máxima difusión a esta nova porta de acceso ao mercado laboral, debullando cada un dos aspectos relevantes dos certificados de profesionalidade.